Dokument 3:16 (2015–2016) / Offentliggjort 06.09.2016 Undersøking av arbeidet til styresmaktene med å styrkje tryggleiken i vegtunnelar

Funn og tilrådingar

Manglar i tryggleiksforvaltninga av tunnelar

• I eit fleirtal av dei risikoanalysane som er undersøkte, er det ikkje dokumentert og vurdert særskilde forhold ved tunnelane som kan påverke faren for uønskte hendingar.
• I om lag halvparten av tunnelane i utvalet er det ikkje gjennomført brannøving – sju av desse er undersjøiske.

Tryggleiksforvaltninga er ikkje godt nok dokumentert

• Dokumentasjon av rutinar og prosedyrar er manglande og mangelfull, og bruken av av forvaltnings-, drifts- og vedlikehaldssystemet PLANIA varierer.
• Dette gjer det vanskeleg å ha ei systematisk tunnelforvaltning.

Vegdirektoratet har ikkje sikra at trafikantar får nok informasjon om sikker åtferd i tunnel

• Vegdirektoratet har ikkje sikra at trafikantane får informasjon om korrekt åtferd ved køyring i tunnel, kva tryggleiksutstyr tunnelar har, eller kvifor det er viktig å bruke dette utstyret i naudssituasjonar.
• Oppgradering vil betre tryggleiksutstyret i tunnelane, men nytta av dette er avhengig av at trafikantane har kunnskap om tiltaka og sjølvredning.

Overordna styresmakter har svak styring og oppfølging

• Vegdirektoratet har anten ikkje utforma eller oppdatert sentrale retningslinjer, rettleiarar og kvalitetssystemet.
• Vegdirektoratet har ikkje god nok informasjon for å følgje opp at tunnelar blir forvalta i tråd med lover og forskrifter.
• Oppgradering av tunnelar har kome svært kort. 

Tilrådingar

Riksrevisjonen rår til at Samferdselsdepartementet sørgjer for at Vegdirektoratet

• bidreg til ei systematisk tryggleiksforvaltning av vegtunnelar ved å oppdatere det faglege rammeverket for tryggleiksforvaltninga, utvikle ein felles rettleiar for beredskapsplanar og styrkje oppfølginga av forvaltninga i regionane
• i samråd med naudetatane styrkjer kompetansen om brann og redning gjennom opplæring og brannøvingar, særleg i risikoutsette vegtunnelar
• tar i bruk vidare tiltak for å styrkje kunnskapen til trafikantane om sjølvredning og tryggleiksutstyr i vegtunnelar

Bakgrunn og mål for undersøkinga

Samferdselsdepartementet har gjennom Statens vegvesen det overordna ansvaret for tryggleiken i norske vegtunnelar. I dei 1130 norske vegtunnelane blir det kvart år i gjennomsnitt registrert om lag 1300 uønskte køyretøystopp, 25 brannar og 15 tilløp til brann.

Undersøkinga tar for seg arbeidet til styresmaktene med tryggleiksforvaltning av vegtunnelar i perioden 2007–2015, basert på eit utval av 41 tunnelar som er vurderte som særleg risikoutsette. Det er sett på oppgradering av tunnelane i samsvar med tunneltryggleiksforskriftene, utarbeiding av og innhald i risikoanalysar og beredskapsplanar, gjennomføring av øvingar og inspeksjonar, og informasjon til trafikantar om tryggleik i tunnelar.

Denne saken er ferdigbehandlet av Stortinget

Saken ble behandlet i Stortinget 9. februar 2017.

Les mer på stortinget.no

Foto: Tor Arvid A. Gundersen og Silje Drevdal, Statens vegvesen