Dokument 3:16 (2025-2026) / Offentliggjort Kommunale helse- og omsorgstenester til eldre
Det er allereie mange fleire eldre i samfunnet, men enno er norske kommunar langt i frå førebudde, viser undersøkinga.
-
(PDF, 2,22 MB)
Last ned fullversjon
Kort bakgrunn
- Det blir stadig fleire eldre i Noreg, samtidig som helse- og omsorgstenestene i kommunane har avgrensa kapasitet.
- For å møte dei framtidige utfordringane er planlegging eit viktig verktøy.
- Vi har undersøkt om kommunane sørgjer for berekraftige helse- og omsorgstenester av god kvalitet til eldre, og om statlege styresmakter legg til rette for dette.
Overordna vurdering
-
Ikkje tilfredsstillande
-
Kritikkverdig
-
Sterkt kritikkverdig
Manglande planlegging av helse- og omsorgssektoren i kommunane vil kunne føre til alvorlege konsekvensar for innbyggjarane. Det er kritikkverdig at Helse- og omsorgsdepartementet ikkje har ettergått at kommunane er tilstrekkeleg førebudde på demografiutfordringane.
Konklusjonar
Dei kommunale helse- og omsorgstenestene er i liten grad dimensjonerte for å møte auken i talet på eldre.
- Andelen som får institusjonsplass eller heimetenester blant dei som er 80 år eller eldre, er redusert.
- Det er usikkert om investeringstilskot til omsorgsbustader og sjukeheimsplassar har ført til fleire heildøgns omsorgsplassar.
- Kvar femte kommune har for få tilsette med rett kompetanse til å gi forsvarlege helse- og omsorgstenester til eldre i sjukeheimar.
- Nesten alle kommunar har teke i bruk velferdsteknologi, men har i liten grad teke ut gevinstar.
- Nivået på helse- og omsorgstenester er redusert i 40 prosent av kommunane, og fleire kommunar planlegg å gjere det.
Det er risiko for svikt i dei kommunale helse- og omsorgstenestene til eldre.
- Det er framleis ei utfordring at fleire kommunale vedtak ikkje dokumenterer kva den eldre sjølv ønskjer.
- Tilsyn av tenester til eldre viser at det er manglar ved styringa og oppfølginga frå leiinga.
- Det er påpeika svakheiter i avvikshandteringa til kommunane i meir enn halvparten av tilsynsrapportane.
- Statleg rettleiing bidreg i varierande grad til forbetringsarbeid i kommunane.
Kommunane planlegg ikkje systematisk for framtida.
- Demografiutfordringane har vore kjende lenge.
- Kommunane har i liten grad berekna det framtidige behovet for helse- og omsorgstenester.
- Mange kommunar har ikkje vedteke tiltak på sentrale område, og planlagde tiltak er lite konkrete.
- Mange kommunar meiner at dei manglar kompetanse og ressursar til å førebu seg på demografiutfordringane.
- Statlege verkemiddel på helseområdet har ikkje i stor nok grad bidrege til planlegginga i kommunane.
Sjølv om Helse- og omsorgsdepartementet har lagt fram mange stortingsmeldingar og sett i verk mange planar, har resultata på området vore avgrensa.
- Det er positivt at Helse- og omsorgsdepartementet sine stortingsmeldingar og planar i perioden 2019–2024 inneheld tiltak som er meinte å bøte på kjende utfordringar i tenestene til eldre, til dømes kvalitet, bemanning og andre utfordringar som følgjer av demografiutviklinga.
- Helse- og omsorgsdepartementet og Helsedirektoratet har gjennom heile undersøkingsperioden sørgt for at det blir gjennomført evalueringar i tråd med Reglement for økonomistyring i staten og Bestemmelser om økonomistyring i staten.
- Trass i dette viser undersøkinga at kommunane framleis har utfordringar med bemanning, med å sikre kvalitet i helse- og omsorgstenestene og med å planleggje tenestene.
Statlege helsestyresmakter har teke i bruk mange verkemiddel, men manglar framleis nødvendig informasjon om kvaliteten i tenestene.
- Det er ikkje alltid dei kommunane som har størst behov, som får tilskot.
- Helsedirektoratet arbeider med å utvikle nettbaserte verktøy for kommunane.
- Klagesaksbehandlinga hos statsforvaltarane tek lang tid.
- Det blir gjennomført få tilsyn med helse- og omsorgstenester til eldre samanlikna med andre brukargrupper.
- Helse- og omsorgsdepartementet manglar nødvendig informasjon om kvaliteten i helse- og omsorgstenestene.
Tilrådingar
Vi tilrår at Helse- og omsorgsdepartementet
- følger opp at kommunane sine helse- og omsorgstenester blir dimensjonert for å dekkje behova til den aukande andelen eldre. I den forbindelse er kommunen si planlegging ei sentral forutsetning for at kommunane kan gi nødvendige helse- og omsorgstenester til sine innbyggarar på kort og lengre sikt.
- sørger for betre kunnskap om kvaliteten på de kommunale helse- og omsorgstenestene, slik at det blir mogleg for statlege myndigheiter og kommunen sjølv å kunne følge med på nivået på og utviklinga i kvaliteten på tenestene.
- sørger for at statsforvaltarane i større grad blir sette i stand til å gjennomføre tilsyn og bistå kommunane i arbeidet deira med planar og kvalitetsforbetring for å sikre eldre brukarar trygge og nødvendige tenester.
- ser til at innretninga på investeringstilskot til omsorgsbustader og sjukeheimsplassar blir tilpassa til ulike kommunar sitt behov for fleire heildøgns omsorgsplassar og alternative bustadtilbod.
Spørsmål?
